Հանրային քննարկում՝ Ջրային կոմիտեում

Ջրային կոմիտեում հունիսի 14-ին հանրային քննարկում է կայացել՝ ՀՀ 2020-2022թթ. ՄԺԾԾ-ի /Միջնաժամկետ ծախսային ծրագրեր/, ներառյալ եկող տարվա պետական բյուջեի հայտի նախագծերի, ինչպես նաև դրանց հիմքում դրված ծախսային հաշվարկ-հիմնավորումների քննարկման նպատակով։

Քննարկմանը մասնակցել են Հանրային խորհրդի ու հասարակական կազմակերպությունների ներկայացուցիչներ, կոմիտեի աշխատակիցներ։ Կառույցի գլխավոր քարտուղար Սամսոն Զատիկյանը ներկայացրել է օրակարգը, քննարկվելիք հարցերի հիմնական ուղղությունները, ֆինանսական բաժնի պատասխանատու Աննա Մարգարյանը մանրամասն ներկայացրել է իրավիճակը՝ ջրային տնտեսության ճյուղերում, խմելու և ոռոգման համակարգերում, ինչպես նաև իրականացվող ծրագրերն ու նոր նախաձեռնությունները։

Ըստ այդմ, 2018թ․ հանրապետությունում գործող ջրօգտագործողների 15ընկերությունների գործունեության արդյունքներով ապահովվել է 92.89 հազ. հա հողատարածքների կայուն ջրամատակարարումը։ Ոռոգման ջրամատակարարման ծառայությունների դիմաց վճարների գանձումը կազմել է շուրջ 3,24 մլրդ դրամ կամ 48 %, ինչի արդյունքում առաջացել են դեբիտորական պարտքեր։

2018 թվականի սակավաջրության և եղանակային անբարենպաստ պայմանների պատճառով համակարգն ունեցել է էլեկտրաէներգիայի գերածախս: Ոռոգման ոլորտում էլեկտրաէներգիայի ծախսը կազմել է 168.3 մլն կՎտ ժ կամ 6.51 մլրդ դրամ:Ոռոգման համակարգի ընկերությունների ֆինանսական կենսունակության ապահովմանը սպառնացող հիմնական խնդիրներից մեկը շարունակում է մնալ ոլորտի կրեդիտորական պարտքերի խնդիրը։

Ոռոգման ծառայությունների արդյունավետության բարձրացման, ծառայությունների մատուցման շարունակականության ապահովման ու մատչելիության պահպանման, համակարգի ընկերությունների ֆինանսական կենսունակության և կայունության բարելավման, ոռոգման համակարգերի և ենթակառուցվածքների պահպանման, արդիականացման նպատակով, ինչպես նաև, ջրօգտագործողների ընկերությունների ինստիտուցիոնալ կարողությունների հետագա հզորացման ակնկալիքով 2020-2022թթ. շարունակական ֆինանսական ներդրումների կարիք կա։