ՀԲ թիմի հետ քննարկվել են համագործակցության նոր ծրագրեր

Դեկտեմբերի 10-11-ը աշխատանքային այցով Հայաստանում է Համաշխարհային Բանկի տեխնիկական թիմը, որը գլխավորում է ՈՒիլֆրիդ Հանդերտմարկը։ Այցի նպատակը ոռոգման համակարգերի կառավարման ինստիտուցիոնալ զարգացման շուրջ երկխոսության շարունակումն է։

Դեկտեմբերի 11-ին պատվիրակությունը հյուրընկալվել է Ջրային կոմիտեում, հանդիպմանը մասնակցել է նաև Ջրային տնտեսության ԾԻԳ-ի ղեկավարը: Տիգրան Քալանթարյանը ներկայացրել է գրասենյակի կողմից իրականացվող՝ Ոռոգման համակարգի բարելավման ծրագրի ավարտական փուլի ընթացքը, քննարկվել են համաձայնեցված գործողությունների կարգավիճակը և Ծրագրի բարեհաջող ավարտի հետ կապված միջոցառումները:Հանդիպման մասնակիցները խոսել են նաև Ծրագրի իրականացման վերջնական հաշվետվության նախապատրաստման մասին: ՈՀԲԾ–ի ավարտը 2019թվականի հունիսին է:

Հանդիպման մասնակիցներն անդրադարձել են նաև գործակցության ընդլայնման, նոր նախաձեռնությունների հնարավորության մասին: Մասնավորապես, օրակարգում ոռոգման ևայլ նպատակներով օգտագործվող փոքր ջրամբարների կառուցման գործում մասնավոր հատվածի ներգրավման հարցն էր: Կոմիտեի նախագահը ներկայացրել է ջրամբարաշինության, որպես երկրի տնտեսության զարգացման ռազմավարական ուղղություններից մեկի, հեռանկարներն ու կարևորությունը, կարևորել հատկապես փոքր ջրամբարների դերը տարածաշրջաններում գյուղատնտեսությունը զարգացնելու կարևոր գործում:

Այցը նաև հնարավորություն է ընձեռել ավելի մանրամասն քննարկել ՀԲ կողմից իրականացվող ուսումնասիրությունն՝ ուղղված ոռոգման համակարգի զարգացման և ոլորտի անվտանգության հարցերին, ինչը Հայաստանի պարագայում կարող է մասնավոր/հանրային ռիսկի գնահատման ձևաչափ ընդունել: