«Երևան» ՋՕԸ-ից կառանձնանա «Մասիս» ՋՕԸ-ն

Նոյեմբերի 29-ին տեղի է ունեցել «Երևան» ջրօգտագործողների ընկերության ներկայացուցիչների ժողովը՝ 20 ներկայացուցիչներից 17-ի մասնակցությամբ:

Ժողովին հրավիրված էին ԷԵԲՊՆ Ջրային կոմիտեի ներկայացուցիչներ, Ջրային տնտեսության ԾԻԳ-ի ներկայացուցիչներ, ինչպես նաև ընկերության գործադիր տնօրեն Մերուժան Ասատրյանը:

Օրակարգում «Երևան» ՋՕԸ վարչական խորհրդի հոկտեմբերի 24-ի N10 որոշմամբ առաջարկվող ընկերության առանձնացման ձևով վերակազմակերպման հարցն էր, որը զեկուցել է վարչական խորհրդի նախագահ Գ. Միչիկյանը:

Միչիկյանը ներկայացրել է ժողովի հիմնական նպատակը, մասնավորապես, նշելով վերջին տարիներին ոռոգման ջրամատակարարման հետ կապված տարեցտարի դժվարացող խնդիրները, ներկայացրել ընկերությունում մասնակցային կառավարման գործընթացների մտահոգող վիճակը:

Զեկուցողը ներկաներին պարզաբանել է, որ ընկերության վերակազմակերպման որոշում ընդունելը ներկայացուցիչների ժողովի բացառիկ իրավասությունն է, ուստի առաջարկել է քննարկել հարցը:

Գ. Միչիկյանն առաջարկել է առանձնացման ձևով վերակազմակերպել «Երևան» ՋՕԸ-ն՝ առանձնացնել Մասիսի տարածաշրջանի և Արտաշատի տարածաշրջանի Արտաշատի ջրանցքի իշխման տակ գտնվող որոշ համայնքների հողատարածքները և ստեղծել «Մասիս» ՋՕԸ, հաշվի առնելով սպասարկման տարածքների տեխնիկատնտեսական նպատակահարմարությունը, ինչպես նաև վարչատարածքային տեղաբաշխվածությունը:

Ներկայացուցիչները միաձայն կողմ են քվեարկել օրակարգի առանցքային հարցին և որոշել հնարավորին արագ սկսել իրավական գործընթացը: Այդ նպատակով ընկերության պատասխանատուները Կանոնակարգող խորհրդին կներկայացնեն Ներկայացուցիչների ժողովի որոշումը: