Մենք պետք է հետևողական գնանք ջրի կորուստների ետևից. Ինեսսա Գաբայան

Համակարգի օպերատիվ խնդիրները պետք է մշտապես մեր տեսադաշտում լինեն ու մենք քայլ առ քայլ պետք է գնանք դրանց լուծմանը: Մեր խնդիրները շատ-շատ են, սակայն մեզնից բացի, ոչ-ոք դրանք չի լուծելու. այս մեկնաբանությամբ այսօր Ջրային կոմիտեի նախագահ Ինեսսա Գաբայանը խորհրդակցություն է հրավիրել և մի շարք հանձնարարականներ տվել աշխատակիցներին:

Ոռոգման և խմելու ջրի մատակարարման հարցեր, խոցելի կետեր: Սևանից ջրառի խնդիրն առաջին հորիզոնականում է. ինչպիսին է իրավիճակը, ինչպես է վերահսկվում այն: Ոռոգման թեժ շրջանում որո՞նք են առաջնային խնդիրները և դրանց լուծման ճանապարհները:

Աշխատանքային հանձնաժողով կձևավորվի՝ լավագույն մասնագետներից` Արփա-Սևան թունելի տեխնիկական վիճակը մանրամասն ուսումնասիրելու նպատակով, ինչին կհաջորդի կառույցի շինարարության ավարտը:
Սկզբունքային խնդիր է ջրի հաշվառումն ու մոնիտորինգը պատշաճ իրականացնելը, քանի որ միայն այդ ճանապարհով է հնարավոր իրավիճակին հստակ տիրապետել և ըստ այդմ, ապահովել ջրամատակարարումը:

Հանձնարարականներից մեկն էլ հէկ-երին էր առնչվում. դրանք պետք է գործեն բացառապես օրենքով սահմանված կարգով և խստագույնս պետք է վերահսկվի ջրառի չափը՝ հստակ հաշվառման մեխանիզմներով, որպեսզի որևէ հէկ չգործի ոռոգման համար նախատեսված ջրի հաշվին:

Կոմիտեի նախագահը հանձնարարել է լրջորեն ուսումնասիրել նաև ջրի կորուստների պատճառները: Հատկապես խմելու ջրի ոլորտում ներկայացվում են ահռելի կորուստներ, ինչը լրացուցիչ ուսումնասիրությունների անհրաժեշտություն է առաջացնում: Մասնավորապես, Ինեսսա Գաբայանը հանձնարարել է ուսումնասիրել խոշոր սպառողների ջրօգտագործման հարցեր:

«Մենք պետք է հետևողական գնանք ջրի կորուստների ետևից. դրանց աղբյուրները բացահայտելով և վերացնելով, մենք զգալի կբարձրացնենք ջրամատակարարման մակարդակը»,- հայտարարել է Ինեսսա Գաբայանը: