Կապսի ջրամբարի շինարարությունը կարևորագույն նշանակություն ունի Հայաստանի համար. Արսեն Հարությունյան
01.06.2017
«KfW բանկը մեծապես գնահատում է Ջրային տնտեսության պետական կոմիտեի հետ համագործակցությունը՝ երկու կողմերի համար կարևորագույն նշանակություն ունեցող նախագծերի շրջանակներում: Ուզում եմ հատուկ նշել, որ Կոմիտեի հետ մեր համագործակցությունը մշտապես եղել է բաց երկխոսության ձևաչափում: Հենց այդ պատճառով էլ այն այսքան արդյունավետ է»,- այս մասին ՋՏՊԿ-ում տեղի ունեցած հանդիպման ժամանակ հայտարարել է KfW գերմանական բանկի նորանշանակ տարածաշրջանային տնօրեն Օլաֆ Զիմելկան:
Ըստ բանկի ներկայացուցչի՝ ՋՏՊԿ հետ համագործակցությունը շատ լավ օրինակ է՝ ծրագրերի իրականացման ընթացքում առաջացող խնդիրները քննարկելու, կարևոր հարցերի շուրջ մոտեցումները հստակեցնելու և մարտահրավերներից չխուսափելու առումով: Ըստ Օ. Զիմելկայի՝ սա արդյունավետ աշխատանքի առաջին գրավականներից մեկն է:
ՋՏՊԿ նախագահ Արսեն Հարությունյանը նորանշանակ պաշտոնյային ներկայացրել է Բանկի հետ իրականացվող ծրագրերի ընթացքը, հատկապես մանրամասնելով Կապսի ջրամբարի հետ կապված աշխատանքները:
Ա. Հարությունյանը նշել է, որ ջրամբարաշինության ծրագիրը բացառիկ նշանակություն ունի Հայաստանի համար, և Վեդու ջրամբարի շինարարական աշխատանքների հաջող մեկնարկը հույս է ներշնչում, որ ծրագրում ներգրավված բոլոր կողմերը պատրաստ են կառուցողական աշխատանքի և համագործակցության.
«Կապսի ջրամբարի շինարարության համար տարվող նախապատրաստական աշխատանքները ծրագրում ենք ավարտին հասցնել մյուս տարեսկզբին: Ամեն ինչ անելու ենք՝ նախատեսված ժամկետներին հասցնելու համար, ինչի համար շատ կարևորում եմ խորհրդատուների և փորձագիտական խմբի հետ համատեղ աշխատանքը: Վերջին մեկ ամսում արձանագրված բարձր աշխատանքային տեմպը պահելու դեպքում՝ նախանշված ժամկետները կարելի է իրատեսական համարել»,- ասել է Ա. Հարությունյանը:
Գերմանական կողմի ներկայացուցիչները պատրաստակամություն են հայտնել հնարավորինս աջակցել Կոմիտեի ջանքերին, քանի որ պատկերացնում են նախագծի բարդությունն ու կարևորությունը.
«Մենք հասկանում ենք, որ նոր ջրամբարի կառուցումն ավելի հեշտ է, քան Խորհրդային Միության տարիներին կառուցված և կիսատ թողնված Կապսի ջրամբարի վերակառուցումը և արդի չափանիշներին համապատասխանեցումը: Նաև գիտակցում ենք նախաձեռնության կարևորությունը Հայաստանի Հանրապետության համար: Այդ իսկ պատճառով պատրաստ ենք հնարավորինս աջակցել այս բարդ ու հավակնոտ նախագծի իրականացման գործում ներդրված ջանքերին»,- ասել է Օ. Զիմելկան: