«Ոռոգման համակարգերի արդիականացման ծրագիրը» մտնում է իրականացման փուլ
05.04.2016
Ջրային տնտեսության պետական կոմիտեն և Եվրասիական Զարգացման Բանկը ավարտում են «Ոռոգման համակարգերի արդիականացում» վարկային ծրագրի նախապատրաստական աշխատանքները, և ծրագիրը մտնում է իրականացման փուլ:
Առաջին փուլի աշխատանքների ամփոփման և ծրագրի ներդրման աշխատանքների պլանավորման հետ կապված խնդիրների քննարկմանն էր նվիրված ՀՀ ԳՆ ջրային տնտեսության պետական կոմիտեում կոմիտեի նախագահ Ա. Հարությունյանի աշխատանքային հանդիպումը բանկի պատվիրակության հետ: Բանկի պատվիրակության կազմում էին բանկի հակաճգնաժամային ֆոնդի ծրագրերի ղեկավար Արտակ Ազիզյանը, բանկի երևանյան ներկայացուցչության տնօրենի տեղակալ Արմեն Պողոսյանը, բանկի կենտրոնական գրասենյակի ներկայացուցիչ, ծրագրի ղեկավար Օլգա Սանիևակը:
Կողմերը գոհունակություն արտահայտեցին ծրագրի նախապատրաստական փուլի աշխատանքների վերաբերյալ, նշեցին, որ վարկային պայմանագիրը ստացել է ՀՀ սահմանադրական դատարանի դրական եզրակացությունը և գտնվում է ԱԺ-ի հաստատման փուլում: Նկատի ունենալով ծրագրի հրատապությունն ու արդիականությունը՝ անհրաժեշտ է նախաձեռնել ծրագրի դիզայնի և գնումների պլանի հաստատման աշխատանքները:
Ծրագիրն ունի 4 բաղադրիչ՝
- մեխանիկական ոռոգման փոխարինում ինքնահոս համակարգով,
- մայր և երկրորդ կարգի ջրանցքների վերականգնում,
- ՋՕԸ-երի ներտնտեսային ոռոգման ցանցերի արդիականացում,
- ՋՕԸ-երի ինստիտուցիոնալ զարգացում:
Ակնկալվում է, որ ծրագրի արդյունքում կընդլայնվեն ոռոգվող տարածքները, մեխանիկական ոռոգումից անցում կկատարվի ինքնահոսի, կվերականգնվի ներքին ցանցը:
Ծրագրի շահառուները կլինեն Արարատի, Արմավիրի, Կոտայքի, Սյունիքի, Արագածոտնի, Գեղարքունիքի շուրջ 97 համայնքների հողօգտագործողներ:
« վերադառնալ ցանկ