Հանդիպում Ասիական Զարգացման Բանկի տնօրինության հետ

Ասիական Զարգացման Բանկը Հայաստանի Հանրապետությունում աշխատում է 2005 թվականից և հանդիսանում է Ջրային տնտեսության պետական կոմիտեի հիմնական գործընկերներից մեկը: Բանկի ֆինանսավորմամբ իրականացվում է <<Ջրամատակարարման և ջրահեռացման (սեկտորի) ծրագիր>>, որի շնորհիվ հանրապետության 10 մարզերի 18 քաղաքային և 92 գյուղական համայնքներում իրականացվում են ջրամատակարարման և ջրահեռացման առկա համակարգերի վերանորոգման ու փոխարինման աշխատանքներ:

Հանդիպումը նախաձեռնել էր ԱԶԲ-ի տարածաշրջանային տնօրեն Դևիդ Դոուլը, հանդիպմանը մասնակցում էր նաև բանկի ծրագրերի ավագ պատասխանատու Գոհար Մուսայելյանը:

Հանդիպման ընթացքում երկկողմանիորեն դրական գնահատվեցին իրականացվող ծրագրի արդյունքները, և կողմերը փոխադարձ հետաքրքրություն ցուցաբերեցին իրականացվող ծրագրի ընդլայնման ու շարունակականության ապահովման ուղղությամբ:

Պարոն Դոուլը կոմիտեի նախագահ Ա. Հարությունյանի ուշադրությունը հրավիրեց ԱԶԲ-ի կողմից առաջիկայում ՀՀ կառավարություն ներկայացվելիք <<Երկրի հետ գործառնությունների բիզնես պլան>> փաստաթղթի նախագծի վրա, որում ներառված են նոր վարկավորման մոտեցումները, ենթադրվող ծավալներն ու տեխնիկական աջակցության հնարավորությունները: Առաջարկ փաստաթղթում որպես ուղղություն վերցված է ջրամատակարարման և ջրահեռացման բարելավումը:

Կոմիտեի նախագահը բանկի ներկայացուցիչների ուշադրությունը հրավիրեց հատկապես սպասարկվող տարածքից դուրս գտնվող բնակավայրերի խնդիրների վրա՝ կարևորելով այն սոցիալական ու հանրային իրավունքների իրացման տեսանկյունով:

Քննարկվեցին ներդրման բոլոր հնարավոր տարբերակները և համաձայնություն ձեռք բերվեց, որ կոմիտեն կքարտեզագրի ներդրումների առկա վիճակը, կբացահայտի հրատապ կարիքներն ու կառավարության քննարկմանը կներկայացնի ծրագրային հայտի նոր առաջարկ: Վարկային նոր միջոցների ներդրումը կկատարվի <<արդյունքների վրա հիմնված գործիքներ>> սկզբունքի կիրառմամբ:

Կոմիտեի նախագահի կողմից կարևորվեց նաև ուսումնասիրության ու ծրագրավորման փուլի աշխատանքների իրականացում միայն դրամաշնորհային միջոցների հաշվին, որին որպես պատասխան հետևեց բանկի պատրաստակամությունը՝ այդ հարցում միջոցներ հատկացնելու վերաբերյալ:

Ջրային տնտեսության պետական կոմիտե